काठमाडौँ । पाकिस्तानको खैबर पख्तुनख्वाको बन्नु जिल्लामा प्रहरी कार्यालय बाहिर आत्मघाती आक्रमण हुदा कम्तीमा पाँच जनाको ज्यान गएको छ भने चार जना गम्भीर घाइते भएका छन् ।

जियो न्यूजका अनुसार प्रहरी कार्यालयलाई लक्षित गरी गरिएको आक्रमण असफल पारिएको भए पनि घटनामा तीन महिला र एक बालकसहित पाँच सर्वसाधारणको मृत्यु भएको हो ।

घटनापछि सुरक्षा र उद्धार टोलीले प्रभावित क्षेत्रमा भग्नावशेष हटाउने, राहत वितरण गर्ने तथा खोजी कार्य जारी राखेको जनाइएको छ ।

हालैका दिनमा सुरक्षा निकायले सञ्चालन गरेका आतंकवादविरुद्धका कारबाहीपछि यो हिंसात्मक घटना भएको बताइएको छ । पछिल्लो दुई दिनमा मात्र खैबर पख्तुनख्वा क्षेत्रमा २२ जना आतंककारी मारिएको बताइएको छ ।

सैनिक जनसम्पर्क निकायका अनुसार अप्रिल १ मा खैबर जिल्लाको बारा क्षेत्र र बन्नुमा गरिएको सूचनामा आधारित कारबाहीमा १३ जना आतंककारी मारिएका थिए । त्यसको भोलिपल्ट उत्तर वजिरिस्तान क्षेत्रमा पाकिस्तान-अफगानिस्तान सीमामा थप आठ जना आतंककारी मारिएको जनाइएको छ ।