काठमाडौँ । राष्ट्रपति रामचन्द्र पौडेलले २६२५ औँ महावीर जयन्तीका अवसरमा देश तथा विदेशमा रहेका सम्पूर्ण जैन धर्मावलम्बीहरूलाई सुख, शान्ति र समृद्धिको कामना गरेका छन् ।

राष्ट्रपतिले दिएको सन्देशमा हरेक वर्ष चैत्र शुक्ल त्रयोदशीका दिन नेपालसहित विश्वभर विभिन्न कार्यक्रम गरी महावीर जयन्ती मनाउने परम्परा रहेको उल्लेख गरेका छन् । उनले महावीरले देखाएको अहिंसा, सत्य, अचौर्य, ब्रह्मचर्य र अपरिग्रहका मार्ग मानव जीवनका लागि मार्गदर्शक रहेको बताएका छन् ।

नेपालमा वैदिक, बौद्ध, जैन, शिखलगायतका समुदायले उत्साहका साथ यो पर्व मनाउँदै आएको उल्लेख गर्दै उनले धार्मिक तथा सांस्कृतिक विविधताबीच सहिष्णुता र सद्भाव कायम गर्न महावीरका शिक्षाले सहयोग पुग्ने विश्वास व्यक्त गरेका छन् ।

राष्ट्रपतिले अहिंसा र संयमको मार्ग अपनाएर समाजमा एकता, विश्वास र प्रेम बढाउन सबैलाई आह्वान गर्दै सभ्य र सुसंस्कृत समाज निर्माणका लागि महावीर जयन्तीले प्रेरणा दिने विश्वास समेत व्यक्त गरेका छन् ।