काठमाडौँ । अरनिको राजमार्ग अन्तर्गत बनेपामा आज बिहान भएको सवारी दुर्घटनामा एक जनाको मृत्यु भएको छ भने अर्का एक जना घाइते भएका छन् ।

प्रहरीका अनुसार बागमती प्रदेश ०१–००४ क ३४२३ नम्बरको टिप्परले बागमती प्रदेश ०२–०६३ प ९१८९ नम्बरको स्कुटरलाई दूरसञ्चार कार्यालय नजिक ठक्कर दिएको हो । दुर्घटनामा स्कुटर चालकको घटनास्थलमै ज्यान गएको पुष्टि गरिएको छ ।

घटनामा घाइते भएका एक जनाको उपचार भइरहेको छ । मृतक र घाइते दुवैको पहिचान खुल्न बाँकी रहेको प्रहरीले जनाएको छ ।

दुर्घटनापछि स्थानीय बासिन्दा आक्रोशित बन्दै टिप्परमा आगजनी गरेका थिए। स्थिति तनावग्रस्त बनेपछि प्रहरीले अवस्था नियन्त्रणमा लिन केही सेल अश्रुग्यास र रबरका गोली प्रहार गरेको थियो ।

जिल्ला प्रहरी कार्यालय काभ्रेपलाञ्चोक का प्रवक्ता प्रहरी नायब उपरीक्षक रविन विष्टले स्थिति नियन्त्रणमा ल्याउने प्रयास भइरहेको जानकारी दिएका छन् । घटनापछि राजमार्गमा सवारी आवागमन अवरुद्ध भएको छ भने प्रहरीले थप अनुसन्धान अघि बढाएको जनाएको छ ।